महागाव क्षेत्रात भेसळयुक्त कारभाराविरोधात कारवाईची अपेक्षा; तुकाराम मुंडे यांच्या आगमनाने वाढली धास्ती

महागाव क्षेत्रात भेसळयुक्त कारभाराविरोधात कारवाईची अपेक्षा; तुकाराम मुंडे यांच्या आगमनाने वाढली धास्ती 

महागाव,(तालुका प्रतिनिधी : शेख नूर शेख हैदर) : अन्न व औषध प्रशासन विभागात अधिकारी तुकाराम मुंडे यांची नियुक्ती झाल्यानंतर महागाव तालुक्यातील भेसळखोर आणि अन्नसुरक्षा नियमांचे उल्लंघन करणाऱ्या व्यावसायिकांमध्ये चिंतेचे वातावरण निर्माण झाले आहे. त्यांच्या कर्तव्यदक्ष, कठोर आणि निर्भीड कार्यशैलीमुळे तालुक्यात विविध चर्चांना उधाण आले असून, नागरिकांमध्येही प्रभावी कारवाईची अपेक्षा व्यक्त केली जात आहे.

महागाव शहरासह ग्रामीण भागात खाद्यपदार्थांमध्ये भेसळ, कालबाह्य वस्तूंची विक्री, निकृष्ट दर्जाच्या उत्पादनांचा पुरवठा तसेच अन्नसुरक्षा नियमांकडे दुर्लक्ष केल्याच्या तक्रारी सातत्याने पुढे येत होत्या. मात्र अशा प्रकरणांवर अपेक्षित प्रमाणात कारवाई होत नसल्याची भावना नागरिकांमध्ये होती. त्यामुळे तुकाराम मुंडे यांच्या आगमनानंतर प्रशासन अधिक सक्रिय होईल, अशी आशा व्यक्त केली जात आहे.

विशेषतः मिठाई, दुग्धजन्य पदार्थ, खाद्यतेल, मसाले, शीतपेये आणि इतर खाद्यपदार्थांच्या गुणवत्तेबाबत वारंवार प्रश्न उपस्थित होत असतात. नागरिकांच्या आरोग्याशी थेट संबंध असलेल्या या विषयात कोणतीही तडजोड होऊ नये, अशी सर्वसामान्यांची मागणी आहे. त्यामुळे अन्न व औषध प्रशासनाने नियमित तपासण्या करून दोषींवर कठोर कारवाई करावी, अशी अपेक्षा व्यक्त होत आहे.

दरम्यान, संभाव्य तपासण्या, नमुना चाचण्या आणि अन्नसुरक्षा नियमांच्या अंमलबजावणीच्या चर्चांमुळे काही व्यावसायिकांनी आपल्या आस्थापनांमधील कागदपत्रे, परवाने, स्वच्छता व्यवस्था आणि मालसाठ्याची पडताळणी सुरू केल्याची माहिती समोर आली आहे. अनेक ठिकाणी अन्नसुरक्षा मानकांचे पालन करण्याकडे विशेष लक्ष दिले जात असल्याचे दिसून येत आहे.

व्यापारी वर्तुळातही या घडामोडींची चर्चा रंगली असून, नियमांचे पालन करणाऱ्या व्यापाऱ्यांनी या बदलाचे स्वागत केले आहे. प्रामाणिक व्यवसाय करणाऱ्यांना यामुळे कोणतीही अडचण नसून, भेसळखोरांवर कारवाई झाल्यास ग्राहकांचा विश्वास अधिक दृढ होईल, असे मत काही व्यापाऱ्यांनी व्यक्त केले.

महागाव तालुक्यात सध्या "भेसळखोरांना आता सावध राहावे लागणार" अशी चर्चा रंगली असून, नागरिकांच्या आरोग्याशी खेळ करणाऱ्यांविरोधात कठोर पावले उचलली जातील, अशी अपेक्षा व्यक्त होत आहे. तुकाराम मुंडे यांच्या नेतृत्वाखाली अन्न व औषध प्रशासन विभाग भेसळखोरीविरोधात किती प्रभावी मोहीम राबवतो, याकडे आता संपूर्ण तालुक्यासह जिल्ह्याचे लक्ष लागले आहे.