महागावात अवैध धंद्यांचे जाळे; नागरिकांमध्ये असुरक्षिततेची भावना, कठोर कारवाईची मागणी

महागावात अवैध धंद्यांचे जाळे; नागरिकांमध्ये असुरक्षिततेची भावना, कठोर कारवाईची मागणी

महागाव,प्रतिनिधी : शेख नूर शेख हैदर : महागाव शहरात अवैध धंद्यांचे वाढते जाळे आणि त्यातून वाढणारी गुन्हेगारी यामुळे नागरिकांमध्ये चिंता व्यक्त केली जात आहे. शहरातील विविध भागांमध्ये सुरू असलेल्या कथित अवैध व्यवसायांमुळे कायदा व सुव्यवस्थेचा प्रश्न निर्माण होत असल्याची चर्चा नागरिकांमध्ये रंगत असून, संबंधित यंत्रणांनी तातडीने कठोर पावले उचलावीत, अशी मागणी पुढे येत आहे.

स्थानिक नागरिकांच्या म्हणण्यानुसार, काही ठिकाणी अवैध धंदे खुलेआम सुरू असल्याने त्याचा सामाजिक वातावरणावर विपरीत परिणाम होत आहे. विशेषतः युवक आणि तरुण पिढी अशा प्रवृत्तींच्या संपर्कात येण्याची शक्यता वाढत असल्याने पालकांमध्येही चिंता वाढली आहे. त्यामुळे अशा प्रकारच्या व्यवसायांवर सातत्यपूर्ण आणि प्रभावी कारवाई करण्याची आवश्यकता व्यक्त केली जात आहे.

दरम्यान, शहरातील बीट व्यवस्थेच्या कार्यपद्धतीबाबतही काही नागरिकांनी प्रश्नचिन्ह उपस्थित केले आहे. अवैध धंद्यांविरोधातील कारवाई केवळ औपचारिक स्वरूपाची असल्याचा आरोप काहींकडून करण्यात येत असून, या सर्व बाबींची निष्पक्ष चौकशी करून वस्तुस्थिती जनतेसमोर आणावी, अशी मागणी होत आहे.

नागरिकांचे म्हणणे आहे की, महागाव शहरातील कायदा व सुव्यवस्था अधिक बळकट करण्यासाठी पोलीस प्रशासनाने विशेष मोहीम हाती घेऊन अवैध व्यवसाय, गुन्हेगारी प्रवृत्ती आणि त्यांना पाठबळ देणाऱ्या घटकांविरोधात कठोर व सातत्यपूर्ण कारवाई करावी. यामुळे शहरातील शांतता आणि सुरक्षितता अबाधित राहण्यास मदत होईल, अशी अपेक्षा नागरिकांनी व्यक्त केली आहे.