स्थानिक गुन्हे शाखेची धडाकेबाज कारवाई; दिवसा घरफोडी करणाऱ्या टोळीचा पर्दाफाश, मुद्देमालासह एकाला अटक
लोक विधान/यवतमाळ : यवतमाळ शहरात गेल्या काही दिवसांपासून दिवसा घरफोडी करणाऱ्या गुन्हेगारांनी धुमाकूळ घातला होता, ज्यामुळे नागरिकांमध्ये भीतीचे वातावरण पसरले होते. या पार्श्वभूमीवर, यवतमाळच्या स्थानिक गुन्हे शाखेने (LCB) अत्यंत कौशल्याने सापळा रचून एका अट्टल गुन्हेगाराला जेरबंद केले आहे. या कारवाईमुळे अवधूतवाडी पोलीस स्टेशनच्या हद्दीतील चोरीचे दोन मोठे गुन्हे उघडकीस आले असून, पोलिसांनी सुमारे २०,००० रुपयांचा मुद्देमाल हस्तगत केला आहे. शेख बिलाल शेख वहाब (वय १९, रा. विदर्भ हाउसिंग सोसायटी, यवतमाळ) असे अटक करण्यात आलेल्या आरोपीचे नाव आहे.
ही कारवाई दिनांक २ मे २०२६ रोजी करण्यात आली. स्थानिक गुन्हे शाखेचे पथक अवधूतवाडी पोलीस स्टेशनच्या हद्दीत पेट्रोलिंग करत असताना त्यांना एका खात्रीशीर गुप्त बातमीदाराकडून माहिती मिळाली की, शेख बिलाल नावाच्या तरुणाने शहरात दिवसा चोऱ्या केल्या असून तो सध्या विदर्भ हाउसिंग सोसायटी परिसरातील आपल्या घराजवळ उभा आहे. माहिती मिळताच गुन्हे शाखेच्या पथकाने विलंब न लावता सदर ठिकाणी धाव घेतली आणि संशयित शेख बिलाल याला ताब्यात घेतले.
पोलिसांनी जेव्हा त्याला त्याचे नाव, गाव आणि पत्ता विचारला, तेव्हा त्याने आपली ओळख पटवून दिली. मात्र, जेव्हा त्याला शहरातील चोरीच्या घटनांबाबत विचारपूस करण्यात आली, तेव्हा त्याने सुरुवातीला पोलिसांना उडवाउडवीची उत्तरे देऊन दिशाभूल करण्याचा प्रयत्न केला. पोलिसांनी त्याला अधिक विश्वासात घेऊन सखोल चौकशी केली असता, त्याने आपल्या गुन्ह्याची कबुली दिली. त्याने सांगितले की, दोन दिवसांपूर्वी त्याने आपला मित्र फारुख उर्फ मुक्का बशीर खान (रा. इंदिरा नगर, यवतमाळ) याच्यासोबत मिळून एका घरातून चोरी केली होती.
पोलिसांनी पंचांसमक्ष आरोपी शेख बिलाल याची झडती घेतली असता, त्याने परिधान केलेल्या काळ्या रंगाच्या पॅंटच्या उजव्या खिशातून ५,००० रुपये रोख रक्कम मिळून आली.
या रकमेबाबत विचारले असता, ती चोरीची असल्याची त्याने कबूल केले. या माहितीची पडताळणी अवधूतवाडी पोलीस स्टेशनमधील अभिलेखाशी केली असता, तेथे गुन्हा अप. क्र. ४९०/२६ कलम ३०३ (१), ३३१ (२) भारतीय न्याय संहितेनुसार (BNS) गुन्हा नोंद असल्याचे निष्पन्न झाले.
तपास पुढे सुरू असताना आरोपीने आणखी एका गुन्ह्याची कबुली दिली. त्याने सांगितले की, २८ एप्रिल २०२६ रोजी दुपारी ४:३० वाजताच्या सुमारास त्याने गोल्डन पार्क, यवतमाळ येथील एका घरातून गॅस सिलेंडर आणि टीव्ही संच चोरला होता. हा सर्व चोरीचा मुद्देमाल त्याने आपल्या घरात लपवून ठेवला होता.
पोलिसांनी त्याच्या घरातून १५,००० रुपये किमतीचा हा मुद्देमाल हस्तगत केला. या चोरीबाबतही अवधूतवाडी पोलीस स्टेशनमध्ये अप. क्र. ४९१/२६ कलम ३०५, ३३१ (३), ३३१ (४) बीएनएस अन्वये गुन्हा दाखल होता. अशाप्रकारे एकूण २०,००० रुपयांचा मुद्देमाल जप्त करण्यात आला असून जप्ती पंचनामा करून आरोपीला पुढील कारवाईसाठी अवधूतवाडी पोलिसांच्या स्वाधीन करण्यात आले आहे.
ही यशस्वी कारवाई यवतमाळचे पोलीस अधीक्षक श्री. कुमार चिंता आणि अपर पोलीस अधीक्षक श्री. अशोक थोरात यांच्या मार्गदर्शनाखाली पार पडली. स्थानिक गुन्हे शाखेचे पोलीस निरीक्षक श्री. सतीश चवरे यांच्या नेतृत्वात पोउपनि गजानन राजमल्लू, पोहवा/अजय डोळे, पोहवा/रुपेश पाली, पोहवा/योगेश डगवार, पोहवा/प्रशांत हेडाऊ, पोहवा/नीलेश राठोड आणि पोशि/सुनील पैठणे या पथकाने ही कामगिरी केली. या कारवाईमुळे गुन्हेगारांवर वचक बसला असून स्थानिक गुन्हे शाखेच्या सतर्कतेचे सर्वत्र कौतुक होत आहे. या प्रकरणातील दुसऱ्या आरोपीचा शोध पोलीस घेत आहेत.
No comments:
Post a Comment