यवतमाळ जिल्ह्यातील दैनिक क्राईम वर आधारित पोलीस डायरी

यवतमाळ जिल्ह्यातील दैनिक क्राईम वर आधारित पोलीस डायरी

१. वैयक्तिक वादातून चारचाकी वाहन जाळले; मेमन कॉलनी परिसरातील घटना

यवतमाळ : शहरातील अवधूतवाडी पोलीस स्टेशन अंतर्गत येणाऱ्या मेमन कॉलनी, भोसा रोड परिसरात जुन्या वादातून एक महागडी चारचाकी गाडी जाळल्याची धक्कादायक घटना उघडकीस आली आहे. फिर्यादी मोहम्मद मुबशीर मोहम्मद रफीक (वय २२ वर्ष) यांनी दिलेल्या तक्रारीनुसार, २९ एप्रिल २०२६ रोजी पहाटे ४:१५ वाजताच्या सुमारास आरोपी शहबाज खान शफीउल्ला खान (वय ३७ वर्ष, रा. अहेबाब सोसायटी) आणि शेख समीर शेख अस्लम (वय २० वर्ष, रा. अशोक नगर) या दोघांनी संगनमत करून फिर्यादीची महिंद्रा कंपनीची XUV500 W8 (क्रमांक MH 29 AD 5432) ही गाडी पेटवून दिली. या आगीत गाडीचे पूर्णतः नुकसान झाले असून फिर्यादीचे अंदाजे ६,५०,००० रुपयांचे आर्थिक नुकसान झाले आहे. अवधूतवाडी पोलिसांनी याप्रकरणी ३० एप्रिल रोजी रात्री गुन्हा दाखल केला असून आरोपींविरुद्ध भादंवि कलम ३२६, ४९, ३(५) अन्वये कारवाई सुरू केली आहे.

२. पचगाडे ले-आऊटमध्ये घरफोडी; ८४ हजारांचा मुद्देमाल लंपास

यवतमाळ : शहरातील भोसा रोडवरील पचगाडे ले-आऊट परिसरात अज्ञात चोरट्यांनी बंद घराचे कुलूप तोडून मोठी घरफोडी केली आहे. मुरलीधर सदाशिव वानखडे (वय ५० वर्ष) हे आपल्या कुटुंबासह राहतात, त्यांच्या घराचा दरवाजा अज्ञात चोरट्याने कशाच्या तरी सहाय्याने तोडून आत प्रवेश केला. चोरट्याने घरातील बेडरूममधील लॉकरमध्ये ठेवलेले नगदी रुपये आणि सोन्या-चांदीचे दागिने असा एकूण ८४,००० रुपयांचा मुद्देमाल लंपास केला. ही घटना २९ एप्रिल रोजी पहाटे ३:०० ते ५:१० च्या दरम्यान घडली. फिर्यादीच्या जबानीवरून अवधूतवाडी पोलिसांनी ३० एप्रिल रोजी अज्ञात आरोपीविरुद्ध कलम ३०३(१), ३३१(२) अन्वये गुन्हा नोंदवला असून पोलीस आता परिसरातील सीसीटीव्ही फुटेजच्या आधारे चोरट्यांचा शोध घेत आहेत.

३. सारस्वत ले-आऊटमधून दुचाकीची चोरी; पोलिसात तक्रार दाखल

यवतमाळ : यवतमाळच्या सारस्वत ले-आऊट परिसरातून एक दुचाकी चोरीला गेल्याची घटना समोर आली आहे. उमेशचंद्र तुळशीराम जयस्वाल (वय ४० वर्ष) यांची बजाज प्लॅटिना दुचाकी (क्रमांक MH 29 Y 3525) अज्ञात चोरट्याने त्यांच्या घरासमोरून पळवून नेली. ही घटना ११ एप्रिल २०२६ रोजी पहाटे ५:०० वाजेच्या सुमारास घडली असून चोरीला गेलेल्या गाडीची किंमत अंदाजे २५,००० रुपये आहे. याप्रकरणी जयस्वाल यांनी अवधूतवाडी पोलीस स्टेशनमध्ये तक्रार दिली असून पोलिसांनी ३० एप्रिल रोजी अज्ञात आरोपीविरुद्ध कलम ३०३(१) अन्वये गुन्हा दाखल केला आहे. शहरात वाढत्या दुचाकी चोरीच्या घटनांमुळे वाहनधारकांमध्ये चिंतेचे वातावरण निर्माण झाले आहे.

४. सोन्याची मूर्ती देण्याच्या नावाखाली २० लाखांची फसवणूक; दोन आरोपींना अटक

यवतमाळ : यवतमाळ ग्रामीण पोलीस स्टेशनच्या हद्दीत सोन्याच्या मूर्तीचे आमिष दाखवून एका व्यक्तीला २० लाख रुपयांचा गंडा घालण्यात आला आहे. फिर्यादी अब्दुल सत्तार अब्दुल गफूर (वय ६१ वर्ष, रा. नवीन लालगुडा, वणी) यांना आरोपी लाईक अनवाज शेख कलीम (वय २५ वर्ष, रा. सावर, ता. बाभुळगाव) आणि आकाश कुमार यांनी गाठले. आरोपींनी संगनमत करून फिर्यादीला ३ किलो वजनाची सोन्याची मूर्ती देतो असे सांगून त्यांच्याकडून २० लाख रुपये घेतले. मात्र, प्रत्यक्ष व्यवहाराच्या वेळी आरोपींनी त्यांना पिवळ्या धातूची बनावट मूर्ती देऊन त्यांची आर्थिक फसवणूक केली. ही घटना २९ एप्रिल रोजी कापरा ते लखमापूर फाटा दरम्यान घडली. ग्रामीण पोलिसांनी याप्रकरणी ३० एप्रिल रोजी गुन्हा दाखल करून दोन्ही आरोपींना ताब्यात घेतले असून अधिक तपास सुरू आहे.